اسلام آباد: ایئر چیف مارشل ظہیر احمد بابر سدھو سے امریکی سفیر ڈونلڈ بلوم نے ملاقات کی، ملاقات میں مشترکہ فضائی مشقوں کے ذریعے تعاون اور تربیت کے شعبے کو فروغ دینے پر اتفاق کیا گیا۔
ترجمان پاک فضائیہ کے مطابق امریکی سفیر ڈونلڈ بلوم نے تکنیکی صلاحیتوں کے تبادلے کی اہمیت پر بھی زور دیا، پاک فضائیہ اور امریکی فضائیہ کے درمیان وفود نے پاک فضائیہ کی جانب سے حال ہی میں قائم کیے گئے ٹیکنو پارکس میں تعاون کی یقین دہانی بھی کرائی۔
ائیر چیف مارشل نے اپنے خطاب میں کہا کہ پاکستان امریکہ کے ساتھ اپنے تعلقات کو قدر کی نگاہ سے دیکھتا ہے، دونوں ممالک کے درمیان تعلقات کو نئی بلندیوں تک لے جانے کے عزم کا اعادہ کیا۔
ترجمان پاک فضائیہ کے مطابق امریکی سفیر نے پاک فضائیہ کے اہلکاروں کی پیشہ وارانہ مہارت کی تعریف کی اور پاک فضائیہ کی جانب سے خود انحصاری کے شعبے میں نمایاں پیش رفت کو سراہا۔
