لاپتہ بلوچ طلبا بازیابی کیس: 3 حساس اداروں کے ڈی جیز پر مشتمل کمیٹی تشکیل

اسلام آباد: لاپتہ بلوچ طلبا کی بازیابی سے متعلق کیس میں اسلام آباد ہائی کورٹ نے تین حساس اداروں کے ڈی جیز پر مشتمل کمیٹی قائم کردی۔اسلام آباد ہائی کورٹ کے مطابق اٹارنی جنرل منصور اعوان بھی کمیٹی کی معاونت کریں گے۔کمیٹی ڈی جی آئی ایس آئی، ڈی جی ایم آئی اور ڈی جی آئی بی پر مشتمل ہوگی، اسلام آباد ہائی کورٹ کے جسٹس محسن اختر کیانی نے گزشتہ سماعت کا تحریری حکم نامہ جاری کیا تھا۔عدالت کے مطابق کمیٹی لاپتہ افراد سے متعلق رپورٹ عدالت میں پیش کرے گی۔ڈی جی انٹیلی جنس بیورو کمیٹی کے چیئرمین ہوں گے، کمیٹی اگلی سماعت سے قبل لاپتہ بلوچ طلبا اور نئے لاپتہ افراد سے متعلق رپورٹ پیش کرے گی۔ کمیٹی متعلقہ ضلع اور ڈویژن کے سیکٹر کمانڈر سے معلومات لے کر سربمہر رپورٹ پیش کرے گی۔عدالت نے حکم دیا کہ کمیٹی جبری گمشدگی میں ملوث ماتحت حکام کے خلاف کارروائی کے لیے سفارشات پیش کرے گی۔ عدالت نے آئندہ سماعت پر وزیراعظم، داخلہ و دفاع اور سیکرٹریز کو بھی طلب کر لیا۔ کیس کی اگلی سماعت 28 فروری کو ہوگی۔