ممبئی: بالی ووڈ کنگ شاہ رخ خان کے بڑے بیٹے آریان خان بطور ہدایت کار فلمی دنیا میں قدم رکھنے کے لیے تیار ہیں۔
بھارتی میڈیا کے مطابق آریان خان اسٹارڈم کے نام سے ایک سیریز کی ہدایت کاری کریں گے جو چھ اقساط پر مشتمل ہوگی اور یہ سیریز نیٹ فلکس پر ریلیز کی جائے گی۔
اس سیریز کے حوالے سے کہا جا رہا ہے کہ اداکارہ مونا سنگھ مرکزی کردار ادا کریں گی جب کہ شاہ رخ خان، کرن جوہر، بوبی دیول، رنبیر کپور اور رنویر سنگھ کیمیو رول ادا کریں گے۔
میڈیا رپورٹس کے مطابق سیریز اسٹارڈم کی اسکرپٹ آریان خان نے دی ہے جب کہ اسے شاہ رخ خان کے پروڈکشن ہاؤس ریڈ چلیز انٹرٹینمنٹ کے بینر تلے ریلیز کیا جائے گا۔
بطور ڈائریکٹر اپنے کیرئیر کا آغاز کرنے کے بارے میں بات کرتے ہوئے آریان خان نے کہا کہ میں اپنا فیشن برانڈ بھی چلا رہا ہوں جس کے لیے بطور تخلیقی ہدایت کار اپنے فرائض سرانجام دے رہا ہوں۔
انہوں نے کہا کہ فیشن برانڈ کی ہدایت کاری اور فلم سیریز کی ہدایت کاری دو مختلف چیزیں ہیں اور میں ابھی سیکھنے کے مرحلے میں ہوں۔
آریان خان نے مزید کہا کہ میرے والد شاہ رخ خان کے پاس علم کا خزانہ ہے، میں کام کے دوران ان سے بہت کچھ سیکھتا ہوں، ان کے ساتھ کام کرنے کا تجربہ بہترین ہے۔
واضح رہے کہ آریان خان DYavol X کے نام سے اپنا لباس برانڈ بھی چلا رہے ہیں، انہوں نے اپنا برانڈ 30 اپریل 2023 کو لانچ کیا تھا۔
