۔ پاکستان سپر لیگ سیزن نائن کے 27ویں میچ میں اسلام آباد یونائیٹڈ نے ملتان سلطانز کو دلچسپ مقابلے کے بعد 3 وکٹوں سے شکست دے دی۔ راولپنڈی کرکٹ سٹیڈیم میں کھیلے گئے میچ میں ملتان سلطانز کا 229 رنز کا ہدف اسلام آباد یونائیٹڈ نے آخری گیند پر 7 وکٹوں کے نقصان پر حاصل کر لیا۔ کامیابی کے بعد اسلام آباد یونائیٹڈ نے 11 پوائنٹس کے ساتھ ٹورنامنٹ کے پلے آف مرحلے کے لیے کوالیفائی کر لیا۔ میچ کے اختتامی لمحات میں عماد وسیم نے شاندار بلے بازی کا مظاہرہ کرتے ہوئے 13 گیندوں پر 30 رنز بنائے۔ جب 20ویں اوور کی آخری دو گیندوں پر سات رنز درکار تھے تو انہوں نے ایک چھکا اور ایک چوکا لگا کر ٹیم کو فتح دلائی۔ ملتان سلطانز کی جانب سے دیے گئے بڑے ہدف کے تعاقب میں اسلام آباد کی دو وکٹیں 4 رنز کے مجموعی سکور پر گر گئیں۔ ایلکس ہیلز صفر اور آغا سلمان 2 رنز بنانے کے بعد پویلین لوٹ گئے جس کے بعد کولن منرو اور کپتان شاداب خان نے ذمہ دارانہ کھیل کا مظاہرہ کیا اور دونوں کے درمیان 64 گیندوں پر 141 رنز کی شراکت قائم ہوئی۔ کولن منرو نے 84 اور شاداب خان نے 54 رنز بنائے، حیدر علی نے 19، فہیم اشرف نے 23 رنز بنائے۔ ملتان سلطانز کی جانب سے عباس آفریدی نے 3، محمد علی نے 2، ڈیوڈ ولی اور کرس جارڈن نے ایک ایک وکٹ حاصل کی۔ اس سے قبل اسلام آباد یونائیٹڈ کے کپتان شاداب خان نے ٹاس جیت کر پہلے فیلڈنگ کا فیصلہ کیا۔ ملتان سلطانز نے مقررہ 20 اوورز میں 4 وکٹوں کے نقصان پر 228 رنز بنائے، اوپنر یاسر خان اور محمد رضوان نے پہلی وکٹ کے لیے 44 رنز کی شراکت قائم کی تاہم کپتان رضوان 20 رنز بنانے کے بعد پویلین لوٹ گئے۔ یاسر خان 33 رنز بنانے میں کامیاب رہے۔ دیگر کھلاڑیوں میں جانسن چارلس نے 16 گیندوں پر 42 رنز بنائے، افتخار احمد نے 13 جبکہ کرس جارڈن نے 15 رنز ناٹ آؤٹ بنائے، ملتان سلطانز کے عثمان خان نے پی ایس ایل کی تیسری سنچری اسکور کی، انہوں نے 50 گیندوں پر 100 رنز بنائے۔ اسلام آباد یونائیٹڈ کی جانب سے فہیم اشرف نے 2، نسیم شاہ اور حنین شاہ نے ایک ایک وکٹ حاصل کی۔ اسلام آباد یونائیٹڈ کپتان شاداب خان، ایلکس ہیلز، کولن منرو، سلمان علی آغا، اعظم خان، حیدر علی، عماد وسیم، فہیم اشرف، حنین شاہ، نسیم شاہ، تیمل ملز۔ ملتان سلطانز کپتان محمد رضوان یاسر خان، طیب طاہر، عثمان خان، جانسن چارلس، افتخار احمد، کرس جارڈن، ڈیوڈ ولی، اسامہ میر، عباس آفریدی، محمد علی
