مہنگی بجلی، ٹیکسز اور مہنگائی کے خلاف حکومت اور جماعت اسلامی کی ٹیموں کے درمیان کمشنر ہاؤس راولپنڈی میں مذاکرات کا آغاز ہو گیا۔
گزشتہ روز حکومت نے جماعت اسلامی کو مذاکرات کی پیشکش کی تھی جسے انہوں نے قبول کر لیا تھا اور جماعت اسلامی نے حکومت کو مذاکرات کے لیے اپنے 10 مطالبات پیش کیے تھے، دونوں جانب سے مذاکرات کے لیے کمیٹیاں تشکیل دی گئی تھیں۔
حکومتی مذاکراتی کمیٹی کی قیادت کرنے والے وزیر اطلاعات عطا تارڑ، امیر مقام، ڈاکٹر طارق فضل چوہدری اور تاجر رہنما کاشف چوہدری بھی کمشنر ہاس میں موجود ہیں۔ کمشنر راولپنڈی اور ڈپٹی کمشنر راولپنڈی حسن وقار چیمہ بھی حکومتی وفد کے ہمراہ ہوں گے جبکہ ایڈیشنل کمشنر کوآرڈینیشن سید نظارت شاہ بھی کمشنر آفس پہنچ گئے ہیں۔
جماعت اسلامی کی 4 رکنی مذاکراتی ٹیم بھی نائب امیر لیاقت بلوچ کی سربراہی میں کمشنر ہاس میں موجود ہے۔ حکومت اور جماعت اسلامی کی ٹیموں کے درمیان مذاکرات کا باقاعدہ آغاز بھی ہو گیا ہے۔
خیال رہے کہ راولپنڈی کے لیاقت باغ میں جماعت اسلامی کا بجلی کے بلوں اور مہنگائی کے خلاف دھرنا تیسرے روز بھی جاری ہے۔
