وزیراعظم سے فلسطینی سفیر کی ملاقات، حمایت پر پاکستانی عوام کا شکریہ ادا کیا

اسلام آباد: وزیراعظم سے فلسطینی سفیر نے ملاقات کی ہے، جس میں انہوں نے فلسطینیوں کی حمایت پر پاکستانی قوم کا شکریہ ادا کیا ہے۔
وزیراعظم نے فلسطین کے صدر ڈاکٹر محمود عباس کا مبارکبادی پیغام پر شکریہ ادا کیا۔
وزیراعظم میاں شہباز شریف نے فلسطین کی آزادی کے لیے مکمل حمایت کا یقین دلایا۔ اس موقع پر وزیر خارجہ سینیٹر محمد اسحاق ڈار، معاون خصوصی طارق فاطمی اور سیکرٹری خارجہ بھی موجود تھے۔
وزیراعظم نے فلسطین کے صدر ڈاکٹر محمود عباس کا مبارکبادی پیغام پر شکریہ ادا کیا۔ انہوں نے غزہ میں جاری اسرائیلی جارحیت کی شدید مذمت کی۔ وزیراعظم نے کہا کہ پاکستان کا فلسطین کی برادر ریاست کے ساتھ تاریخی اور قریبی رشتہ ہے۔ پاکستان نے اقوام متحدہ، او آئی سی اور دیگر عالمی فورمز پر مسئلہ فلسطین کی مسلسل حمایت کی ہے۔
شہباز شریف نے فلسطینی عوام کے خلاف شروع کی جانے والی نسل کشی کی جنگ فوری طور پر بند کرنے کے مطالبے کا اعادہ کیا۔ انہوں نے اسرائیلی فورسز کی وحشیانہ کارروائیوں میں 32 ہزار سے زائد فلسطینیوں کی شہادت پر گہرے دکھ کا اظہار کیا۔
وزیراعظم نے جنوبی افریقہ کی جانب سے دائر کیس میں عالمی عدالت انصاف کے عبوری فیصلے پر بھی تبادلہ خیال کیا۔ واضح رہے کہ پاکستان نے آئی سی جے میں بھی فلسطین کی حمایت کی تھی۔
اجلاس میں اقوام متحدہ کی سلامتی کونسل کی قرارداد 2728 کی منظوری کا خیرمقدم کیا گیا۔وزیراعظم نے فلسطینی سفیر کو مکمل تعاون اور یکجہتی کا یقین دلایا اور کہا کہ پاکستان فلسطینی عوام کے ساتھ اظہار یکجہتی کے لیے ہر عالمی فورم پر آواز بلند کرتا رہے گا۔ پاکستان اب تک غزہ کے عوام کے لیے امدادی سامان کی 7 قسطیں بھیج چکا ہے۔ وزیراعظم نے کہا کہ عید کے فوراً بعد امداد کی قسط بھیجنے کا بھی منصوبہ ہے۔
فلسطینی سفیر نے مکمل حمایت پر وزیراعظم اور پاکستانی عوام کا شکریہ ادا کیا۔