دہشت گردوں کے لیے مفتی یا حافظ جیسے الفاظ استعمال نہیں کیے جائیں گے، وزارت داخلہ

اسلام آباد: وزارت داخلہ نے سرکاری اداروں کو ہدایات دی ہیں کہ ٹی ٹی پی کو فتنہ الخوارج کہا جائے اور دہشت گرد تنظیموں کے افراد کے ساتھ لفظ حافظ اور مفتی کے بجائے خارجی لکھا جائے۔
ایکسپریس نیوز کے مطابق وزارت داخلہ نے اس حوالے سے نوٹی فکیشن جاری کیا ہے جس میں کہا گیا ہے کہ تحریک طالبان پاکستان (ٹی ٹی پی) کی اسلام کی حقیقی تعلیمات کے منافی حرکات اور دہشت گردانہ سرگرمیوں کے باعث اب سے ٹی ٹی پی کو فتنہ الخوارج کہا جائے گا۔
مزید برآں اس دہشت گرد تنظیم سے وابستہ افراد کی طرف سے استعمال کیے جانے والے تمام معزز مذہبی القاب جیسے مفتی اور حافظ استعمال نہیں کیے جائیں گے اس کے بجائے، تمام خط و کتابت اور دستاویزات میں ان کے ناموں کے ساتھ لفظ خارجی لکھا اور پڑھا جائے گا اس اقدام کا مقصد تنظیم کی حقیقی نوعیت اور نظریے کی عکاسی کرنا ہے۔
نوٹی فکیشن میں تمام سرکاری اداروں کو ہدایت دی گئی ہے کہ وہ مذکورہ ہدایات کو فوری طور پر لاگو کریں، یہ نوٹی فکیشن وفاقی وزارتوں/ ڈویژنوں اور دیگر انتظامی کنٹرول کے تحت تمام محکموں اور اداروں کو بھی بھیجا جائے گا۔