پاک فضائیہ کے دستے کی رائل انٹرنیشنل ایئر ٹیٹو 2025ء میں شرکت کیلیے برطانیہ آمد
پاکستان ایئرفورس کا دستہ رائل انٹرنیشنل ایئر ٹیٹو 2025ء میں شرکت کے لیے برطانیہ پہنچ گیا۔جے ایف-17 تھنڈر بلاک تھری اور سی-130 ہرکولیس ٹرانسپورٹ طیاروں پر مشتمل پاک فضائیہ کا دستہ برطانیہ میں منعقدہ رائل انٹرنیشنل ایئر ٹیٹو – 2025 میں شرکت کے لیے رائل ایئر فورس بیس فیئرفورڈ پہنچ گیا۔دنیا کے سب سے بڑے ملٹری ایئر شوز میں سے ایک، رائل انٹرنیشنل ایئر ٹیٹو میں پاک فضائیہ کی شرکت اس کی پیشہ ورانہ مہارت، آپریشنل صلاحیتوں اور ہوا بازی کی صنعت میں اس کے خود کفیل ہونے کی واضح دلیل ہے۔اس بین الاقوامی تقریب میں اپنی شرکت کی آپریشنل اہمیت کو مزید اجاگر کرتے ہوئے پاک فضائیہ کے جے ایف-17 تھنڈر بلاک تھری طیاروں نے پاکستان سے برطانیہ سفر کے دوران پاکستان ائیر فورس کے آئی ایل-78 ٹینکر طیارے کی مدد سے دوران پرواز ایندھن بھرنے کے آپریشن کو کامیابی سے سر انجام دیا۔دوران پرواز ایندھن بھرنے کے اس پیچیدہ آپریشن نے پاک فضائیہ کی طویل فاصلے تک مؤثر آپریشنل صلاحیتوں اور اپنے فضائی و زمینی عملے کی ملکی سرحدوں سے پار وسیع پیمانے پر آپریشنز کی انجام دہی کی صلاحیت کا جامع ثبوت دیا۔جے ایف-17 تھنڈر بلاک تھری ایسا ریڈار اور لانگ رینج بی-وی-آر میزائلوں سے لیس 4.5 جنریشن کا ملٹی رول لڑاکا طیارہ ہے جو عصر حاضر کے دفاعی چیلنجز کا سامنا کرتے ہوئے ملکی فضائی برتری کو تقویت دینے اور مختلف اقسام کے عسکری مشنز کامیابی سے سرانجام دینے کی صلاحیت رکھتا ہے۔حالیہ پاک بھارت جنگ میں اپنی صلاحیتوں کا لوہا منوانے کے بعد برطانیہ میں ہوابازی کے شائقین اور دفاعی مبصرین پاکستان ایئر فورس کے جے ایف-17 تھنڈر بلاک-III کی فیرفورڈ آمد کا بےتابی سے انتظار کر رہے تھے۔ جے ایف-17 تھنڈر کی ثابت شدہ عسکری صلاحیتوں اور آپریشنل فوقیت نے عالمی سطح پر نمایاں توجہ حاصل کی ہے۔رائل انٹرنیشنل ایئر ٹیٹو کے تھیمڈ آرٹسٹک ڈسپلے کی سالانہ روایت کے پیش نظر پاک فضائیہ کے سی-130 ہرکولیس کو اس سال کی تھیم، "Eyes in the Sky” سے منسوب ایک خصوصی لایوری سے مزین کیا گیا ہے۔پاک فضائیہ کی تخلیقی صلاحیتوں اور آپریشنل وژن کی عکاسی کرتے ہوئے یہ شاندار آرٹ ورک تقریب کے دوران بین الاقوامی ماہرین و مبصرین کی توجہ کا خصوصی مرکز رہے گا۔رائل انٹرنیشنل ایئر ٹیٹو 2025 میں پاک فضائیہ کے جدید لڑاکا طیاروں اور تخلیقی انداز میں پینٹ کیے گئے سی-130 ہرکولیس کی شرکت کا مقصد ہوا بازی کے شعبے میں مشترکہ تجربات سے استفادہ حاصل کرنا ہے۔رائل انٹرنیشنل ایئر ٹیٹو میں شرکت سے پاک فضائیہ عالمی امن اور سلامتی میں اپنا کردار ادا کرنے کے ساتھ ساتھ خود کو تکنیکی طور پر ایک ترقی یافتہ فضائی قوت کے طور پر اجاگر کرے گی۔
