اسرائیل کا غزہ میں اقوام متحدہ کی گاڑی پر حملہ؛ 2 غیر ملکی اہلکار مارے گئے

غزہ: رفح میں اسرائیلی فوج نے ایک گاڑی کو نشانہ بنایا جس پر اقوام متحدہ کا جھنڈا لگا ہوا تھا جو طبی امداد پہنچانے کے لیے ایک یورپی اسپتال جا رہی تھی۔ غزہ میں اب تک اقوام متحدہ کے 190 اہلکار مارے جا چکے ہیں۔ ہلاک ہونے والے ارکان میں سے تمام فلسطینی تھے۔ عالمی خبر رساں ادارے کے مطابق اقوام متحدہ کے ترجمان نے بتایا کہ اسرائیلی فوج کو عملے کے ارکان کی جانب سے ان کی نقل و حرکت سے آگاہ کردیا گیا تھا تاکہ کوئی ناخوشگوار واقعہ پیش نہ آئے۔ دوسری جانب اسرائیلی ڈیفنس فورسز کے ترجمان نے کہا کہ ہمیں گاڑی کے روٹ کے بارے میں آگاہ نہیں کیا گیا۔ واقعے کی تحقیقات کی جارہی ہیں۔ اقوام متحدہ کے دفتر برائے رابطہ برائے انسانی امور کی ترجمان اولگا چیریونو کے مطابق 7 اکتوبر سے اسرائیل اور حماس کی جنگ کے دوران غزہ میں اقوام متحدہ کے 191 کارکن مارے جا چکے ہیں جن میں سے تقریباً تمام فلسطینی تھے۔ تاہم آج اقوام متحدہ کی بین الاقوامی سطح پر ہلاکتوں کا پہلا واقعہ ہے جس میں کسی غیر ملکی اہلکار کی موت ہوئی ہے۔ اس شخص کی شناخت ویبھاو انیل کے طور پر کی گئی ہے، جو سیفٹی اینڈ سیکورٹی ڈیپارٹمنٹ میں کام کرتا تھا۔ تاہم ابتدائی طور پر شدید زخمی ہونے والے دوسرے اہلکار کی شناخت تاحال ظاہر نہیں کی گئی تاہم وہ بھی دوران علاج زخموں کی تاب نہ لاتے ہوئے دم توڑ گیا۔ اسرائیلی وزیر اعظم کے دفتر کے ترجمان ایوی ہیمن نے ایک نیوز بریفنگ میں کہا کہ امداد کی تقسیم کے لیے اقوام متحدہ کی رابطہ کاری کی تمام درخواستوں میں سے 87 فیصد کی منظوری دی گئی تھی، لیکن سفری منظوری ہمیشہ امدادی کارکنوں کو دی جاتی ہے۔ یہ محفوظ راستہ کی ضمانت نہیں دیتا