ملتان: قومی کرکٹر شعیب ملک کی اہلیہ اداکارہ ثنا جاوید کو ملتان اسٹیڈیم میں مداحوں نے ٹرول کردیا۔

حال ہی میں پاکستان کرکٹ ٹیم کے سابق کپتان شعیب ملک کے ساتھ شادی کے بندھن میں بندھنے والی اداکارہ ثنا جاوید پیر کو کراچی کنگز اور ملتان سلطانز کے درمیان ہونے والے پاکستان سپر لیگ کے میچ میں اپنے شوہر شعیب ملک کو سپورٹ کرنے ملتان کرکٹ اسٹیڈیم آئیں۔ انہیں ایک ناخوشگوار واقعہ کا سامنا کرنا پڑا۔
میچ کے دوران اسٹیڈیم میں موجود تماشائیوں نے ثناء جاوید کو دیکھ کر ثانیہ مرزا کے نعرے لگائے جس پر ثنا جاوید قدرے پریشان نظر آئیں تاہم انہوں نے بظاہر خود کو قابو میں رکھا۔
سوشل میڈیا پر مداحوں کی جانب سے شیئر کی گئی ویڈیوز میں ثنا جاوید کو ثانیہ میراز کے نعرے لگانے کے بعد سامعین کی طرف متوجہ ہوتے دیکھا جا سکتا ہے۔
آل راؤنڈر شعیب ملک پی ایس ایل 9 میں کراچی کنگز کی جانب سے کھیل رہے ہیں، ان کی ٹیم کو اپنے پہلے میچ میں شکست کا سامنا کرنا پڑا تاہم شعیب ملک نے ذاتی کارکردگی کا مظاہرہ کرتے ہوئے نصف سنچری اسکور کی۔
رواں سال 10 جنوری کو ثنا جاوید اور شعیب ملک نے ایک دوسرے سے شادی کی تصدیق کی تھی۔
شعیب ملک کی پہلی شادی 2010 میں بھارتی ٹینس اسٹار ثانیہ مرزا سے ہوئی تھی، اور ان کا ایک بیٹا اذہان مرزا ملک ہے، جو 2018 میں پیدا ہوا۔
دسمبر 2022 سے سوشل میڈیا پر شعیب ملک اور ثانیہ مرزا کی طلاق کی خبریں گردش کر رہی تھیں تاہم دونوں ستاروں کی جانب سے طلاق کی تردید یا تصدیق نہیں کی گئی۔
دوسری جانب اداکارہ ثنا جاوید نے گلوکار عمیر جسوال سے سال 2020 میں شادی کی۔
جوڑے نے اپنی شادی کی تصاویر اپنے انسٹاگرام اکاؤنٹ پر پوسٹ کی تھیں جب کہ ان کی علیحدگی کی خبر سال 2023 میں سامنے آئی تھی۔