قراقرم ہائی وے پر لینڈ سلائیڈنگ؛ فوج اور سول انتظامیہ کا مشترکہ ریسکیو آپریشن

راولپنڈی: پاک فوج اور سول انتظامیہ نے شاہراہ قراقرم پر لینڈ سلائیڈنگ کے باعث پھنسی 20 گاڑیوں اور ان کے مسافروں کو بچا کر چلاس منتقل کردیا۔ پاک فوج کے شعبہ تعلقات عامہ (آئی ایس پی آر) کے مطابق ضلع دیامر میں 2 اور 3 مارچ کو 36 گھنٹے تک جاری رہنے والی بارش کے باعث شاہراہ قراقرم پر لینڈ سلائیڈنگ ہوئی اور کئی مقامات پر آمدورفت مکمل طور پر بند ہوگئی۔ آئی ایس پی آر کے مطابق اس موقع پر پاک فوج نے جی بی اسکاٹس کی جانب سے شاہراہ قراقرم میں پھنسے مسافروں اور گاڑیوں کو فوری امداد فراہم کرنے کے لیے موثر کوششیں کیں اور راولپنڈی سے گلگت جانے والے ڈاکٹر کو اہل خانہ کے ہمراہ بچا لیا گیا۔ اس کے علاوہ گاڑیوں میں پھنسے 20 افراد کو بچا کر چلاس منتقل کر دیا گیا۔ آئی ایس پی آر کے مطابق گلگت بلتستان کے سکاٹس نے مسافروں کو خوراک اور ادویات فراہم کیں جبکہ ایف ڈبلیو او اور سول انتظامیہ نے بھی پاک فوج کے ساتھ روڈ کلیئرنس آپریشن میں حصہ لیا۔ آئی ایس پی آر کے مطابق شاہراہ قراقرم پر آپریشن کو مزید موثر بنانے کے لیے ڈرون کی مدد بھی لی گئی اور پاک فوج اور سول انتظامیہ کی جانب سے بروقت ریسکیو آپریشن کو متاثرہ خاندانوں کی جانب سے بے حد سراہا گیا ہے۔