پاکستان تحریک انصاف (پی ٹی آئی) کے رہنما عمر ایوب کو قومی اسمبلی میں قائد حزب اختلاف مقرر کر دیا گیا ہے۔
اسمبلی سیکرٹریٹ سے جاری پریس ریلیز کے مطابق یہ پیشرفت اس وقت سامنے آئی جب پی ٹی آئی رہنما گوہر خان، عامر ڈوگر اور عمر ایوب نے سپیکر قومی اسمبلی ایاز صادق سے ملاقات کی۔
بیان میں کہا گیا کہ قائد حزب اختلاف کی نامزدگی کا معاملہ زیر بحث آیا، عمر ایوب کا نام پیش کیا گیا۔
بعد ازاں قومی اسمبلی میں قواعد و ضوابط کے رول 39 کے تحت جانچ پڑتال کا عمل مکمل ہونے کے بعد ایاز صادق نے ایوب کو قائد حزب اختلاف قرار دے دیا۔
بیان میں مزید کہا گیا کہ قائد حزب اختلاف کے لیے کاغذات نامزدگی جمع کرانے کی آخری تاریخ پیر کی شام 6 بجے تھی، اس آخری تاریخ تک کسی اور امیدوار کے کاغذات نامزدگی موصول نہیں ہوئے۔
قومی اسمبلی سیکرٹریٹ سے جاری نوٹیفکیشن میں کہا گیا ہے کہ عمر ایوب کو 2 اپریل (آج) سے اپوزیشن لیڈر کا عہدہ دے دیا گیا ہے۔
عمر ایوب خان کے قائد حزب اختلاف مقرر ہونے کے بعد قومی اسمبلی میں قائد حزب اختلاف کی تقرری کا مرحلہ مکمل ہوگیا۔
واضح رہے کہ 9 مارچ کو پی ٹی آئی اور سنی اتحاد کونسل (ایس آئی سی) نے سپیکر قومی اسمبلی سردار ایاز صادق کے دفتر میں عمر ایوب کا نام اپوزیشن لیڈر کے لیے جمع کرایا تھا۔
عمر ایوب کے کاغذات نامزدگی ملک عامر ڈوگر کی جانب سے سنی اتحاد کونسل کے سربراہ صاحبزادہ حامد رضا، اراکین قومی اسمبلی علی محمد خان، ریاض فتیانہ، ڈاکٹر نثار احمد جٹ اور دیگر کی موجودگی میں جمع کرائے گئے۔
