گورنر خیبر پختونخوا فیصل کریم کنڈی اور وزیراعلیٰ علی امین گنڈا پور نے پوری قوم کو یوم آزادی پر مبارکباد دیتے ہوئے اپنے پیغامات بھی دیے ہیں۔گورنر ہاؤس پشاور میں یوم آزادی کی مناسبت سے پروقار پرچم کشائی کی تقریب ہوئی، جس میں پشاور میں تعینات امریکا، ایران اور افغانستان کے قونصل جنرلز نے خصوصی شرکت کی۔ گورنر ہاؤس کا عملہ و دیگر مہمان گرامی بھی تقریب میں شریک تھے۔گورنر خیبر پختونخوا نے تینوں ممالک کے قونصل جنرلز کے ہمراہ یوم آزادی پاکستان کا کیک بھی کاٹا۔ تقریب کا آغاز قومی ترانہ سے کیا گیا، پولیس کی جانب سے سلامی بھی پیش کی گئی۔فیصل کریم کنڈی کا کہنا تھا کہ آج ہم جشن آزادی معرکہ حق میں شاندار کامیابی کے ساتھ منا رہے ہیں، معرکہ حق میں پاکستان نے نہ صرف بھارت کے غرورکو خاک میں ملا دیا بلکہ ملکی سرحدوں اور اپنی آزادی کا بھرپور دفاع بھی کیا۔گورنر نے کہا کہ معرکہ حق میں پوری دنیا کو ملکی سالمیت کے لیے پاکستانی قوم کا اتحاد، عزم اور بلند جزبہ دیکھنے کو ملا، 14 اگست کا دن ہماری آزادی، خودمختاری اور قومی تشخص کی علامت ہے۔ آج کا دن ہمیں یاد دلاتا ہے کہ ہمارے آباؤ اجداد نے قربانیوں اور جدوجہد کے ذریعے ایک آزاد وطن کا خواب حقیقت بنایا۔جشن آزادی کے موقع پر وزیراعلیٰ خیبر پختونخوا علی امین گنڈاپور نے کہا کہ پوری قوم بالخصوص خیبرپختونخوا کے عوام کو 78 ویں جشن پاکستان مبارک ہو، جشن پاکستان وطن عزیز کی بقاء و سلامتی اور ترقی و خوشحالی کے لیے تجدیدِ عہد کا دن ہے۔علی امین گنڈاپور نے کہا کہ پاکستان برصغیر کے مسلمانوں کی طویل جدوجہد اور عظیم قربانیوں کا ثمر ہے، ہم اپنے اسلاف کی ان قربانیوں اور جدو جہد کو خراج عقیدت پیش کرتے ہیں۔ ہم اس عزم کا اعادہ کرتے ہیں کہ وطن عزیز کو عظیم ملک بنانے کے لیے ان نظریات پر کار بند رہیں گے جو اس کے حصول کی بنیاد ہیں۔وزیر اعلیٰ نے کہا کہ اس دفعہ معرکہ حق ( بنیان مرصوص) کا جشن بھی منایا جا رہا ہے جس سے جشن آزادی کی خوشیاں دوبالا ہو گئی ہیں، ہم ان شہداءکو خراج عقیدت پیش کرتے ہیں جن کی قربانیوں نے اس فتح کی راہ ہموار کی۔وزیراعلیٰ کے پی کا کہنا تھا کہ آج ہم سب کو اس عہد کی تجدید کرنی ہے کہ ہم قائداعظم کے وژن کے مطابق پاکستان کو عظیم ملک بنانے میں اپنا کردار ادا کریں گے، ہم تحریک آزادی کے شہداء سمیت پاکستان کے دفاع و سلامتی کیلئے جانوں کا نذرانہ پیش کرنے والے تمام شہداءکو خراج عقیدت پیش کرتے ہیں۔
