فوج کا انتخابی عمل سے عوام کو تحفظ فراہم کرنے کے سوا کوئی تعلق نہیں، کور کمانڈرز کانفرنس

کور کمانڈرز کانفرنس میں پاک فوج کو بدنام کرنے کی سازشوں کی مذمت کرتے ہوئے کہا گیا ہے کہ فوج کا انتخابی عمل سے عوام کو تحفظ فراہم کرنے کے علاوہ کوئی تعلق نہیں۔ پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق 263ویں کور کمانڈرز کانفرنس جنرل ہیڈ کوارٹرز (جی ایچ کیو) راولپنڈی میں ہوئی۔ فورم نے شہداء کی عظیم قربانیوں کو زبردست خراج تحسین پیش کیا جن میں مسلح افواج، قانون نافذ کرنے والے اداروں کے افسران اور جوانوں اور شہریوں نے ملک میں امن و استحکام کو یقینی بنانے کے لیے اپنی جانوں کا نذرانہ پیش کیا۔ فورم نے اس عزم کا اظہار کیا کہ دہشت گردوں، ان کے سہولت کاروں اور ان کی حوصلہ افزائی کرنے والے، پاکستان کو غیر مستحکم کرنے کے لیے دشمن قوتوں کے کہنے پر کام کرنے والوں سے ریاست کی پوری طاقت سے نمٹا جائے گا۔ آرمی چیف نے کمانڈرز کو ہدایت کی کہ وہ دہشت گردی اور عسکریت پسندی کے خلاف کوششوں کے ثمرات کو مستحکم کرتے رہیں۔ فورم نے مقبوضہ جموں و کشمیر میں کشمیریوں پر جاری ظلم و ستم پر تشویش کا اظہار کیا اور انسانی حقوق کی مسلسل خلاف ورزیوں کی مذمت کی۔ فورم نے اس بات کا اعادہ کیا کہ پاکستان اپنے کشمیری بھائیوں اور بہنوں کی ہر سطح پر سیاسی، سفارتی اور اخلاقی حمایت جاری رکھے گا۔ فورم نے فلسطینی عوام کے ساتھ مکمل یکجہتی کا اظہار کیا اور غزہ میں انسانی حقوق کی سنگین خلاف ورزیوں اور جنگی جرائم کی مذمت کی۔ آرمی چیف نے کہا کہ فلسطینی عوام کو پاکستانی قوم کی مکمل سفارتی، اخلاقی اور سیاسی حمایت حاصل ہے، جب کہ وہ مسئلہ فلسطین کے پائیدار حل کے لیے اپنے بھائیوں کے اصولی موقف کی حمایت جاری رکھیں گے۔ فورم نے عام انتخابات کے دوران انتخابی عمل کے لیے محفوظ اور پرامن ماحول پیدا کرنے کے لیے الیکشن کمیشن آف پاکستان کی ہدایات کی روشنی میں ہر ممکن تعاون فراہم کرنے پر سول انتظامیہ، قانون نافذ کرنے والے اداروں اور سیکیورٹی فورسز کی کوششوں کو سراہا۔