غزہ کے علاقے دیر البلاح میں اسرائیلی فوج کی وحشیانہ بمباری میں چار ماہ کا بچہ یاسر بھی شہید ہوگیا۔ گزشتہ 24 گھنٹوں میں شیر خوار یاسر سمیت 14 معصوم بچے اور 100 سے زائد فلسطینی شہید ہوئے۔
ایران کے سپریم لیڈر آیت اللہ خامنہ ای نے غزہ میں بے گناہ فلسطینیوں کی ہلاکتوں پر دوہرا معیار اپنانے پر مغربی رہنماؤں کو خونخوار بھیڑیا قرار دیا ہے۔ایک تقریب سے خطاب کرتے ہوئے آیت اللہ خامنہ ای نے کہا کہ انسانی حقوق کے علمبردار مغرب نے فلسطینیوں کی ہلاکتوں پر آنکھیں بند کر رکھی ہیں۔انہوں نے کہا کہ امریکا نے غزہ میں بمباری روکنے کی قرارداد کو ڈھٹائی سے ویٹو کردیا، مغربی رہنما اوپر سے مہربان ہیں لیکن اندر سے خون کے پیاسے بھیڑیے ہیں۔
دوسری جانب حماس نے اسرائیل کو رمضان کے مہینے میں مسجد الاقصی میں مسلمانوں کے داخلے پر پابندی کے اسرائیلی منصوبے کے سنگین نتائج سے خبردار کیا ہے۔
دوسری جانب یرغمالیوں کی رہائی کے حوالے سے مذاکرات کے حوالے سے اسرائیلی میڈیا کا کہنا ہے کہ پیرس میں ہونے والے مذاکرات میں غزہ جنگ میں 6 ہفتے کے وقفے اور سیکڑوں فلسطینی قیدیوں کی رہائی کا امکان ہے۔ اسرائیلی میڈیا کے مطابق امریکا رمضان المبارک سے قبل غزہ پر کسی معاہدے پر پہنچنا چاہتا ہے۔
اسرائیلی میڈیا کے مطابق پیرس میں امریکا، اسرائیل، مصر اور قطر کے نمائندوں کی ملاقات ہوئی، پیرس مذاکرات میں مغویوں کی رہائی کے حوالے سے ہونے والے مذاکرات میں پیش رفت سامنے آئی ہے۔
واضح رہے کہ 7اکتوبر سے غزہ میں اسرائیلی فوج کی انسانیت سوز کارروائیوں میں اب تک 29 ہزار 606 فلسطینی شہید اور 69 ہزار 737 سے زائد زخمی ہو چکے ہیں۔شہید اور زخمی ہونے والوں میں نصف سے زیادہ صرف بچے اور خواتین ہیں۔
