اسلام آباد: امریکی سفیر نے پاکستان اور آئی ایم ایف کے درمیان معاہدے کے لیے حمایت کی یقین دہانی کرادی۔
وفاقی وزیر خزانہ محمد اورنگزیب سے امریکی سفیر ڈونلڈ بلوم نے ملاقات کی جس میں پاکستان کے اصلاحاتی اہداف بشمول ملک کی ٹیکس انتظامیہ اور سرمایہ کاری کے ماحول کو بہتر بنانے کے لیے مزید امریکی تعاون اور حمایت پر تبادلہ خیال کیا گیا۔
امریکی سفیر ڈونلڈ بلوم نے آئی ایم ایف کے ساتھ پاکستان کے موجودہ اسٹینڈ بائی انتظامات کو مکمل کرنے کے لیے امریکی حکومت کی حمایت کا یقین دلایا۔
انہوں نے دونوں ممالک کے درمیان باہمی دلچسپی کے شعبوں میں امریکہ پاکستان اقتصادی تعاون کو مزید وسعت دینے کے عزم پر زور دیا۔
