ایران میں بی ایل اے اور بی ایل ایف کے ٹھکانوں کو کامیابی سے نشانہ بنایا، آئی ایس پی آر
اسلام آباد: آئی ایس پی آر نے ایران میں جوابی سرجیکل اسٹرائیک پر کہا ہے کہ ایران میں صرف دہشت گردوں کو نشانہ بنایا گیا اور اس بات کو یقینی بنایا گیا کہ شہریوں کو کوئی نقصان نہ پہنچے۔آئی ایس پی آر نے اپنے بیان میں کہا ہے کہ پاک فوج کی جانب سے ایران کی سرحدوں میں کیے جانے والے آپریشن کو مارگ بار سرمچار کا نام دیا گیا ہے، جس میں بلوچستان لبریشن آرمی اور بلوچستان لبریشن فرنٹ نامی دہشت گرد تنظیموں کے زیر استعمال ٹھکانوں کو انٹیلی جنس کی بنیاد پر آپریشن میں کامیابی سے نشانہ بنایا گیا، نشانہ بنائے گئے ٹھکانے یہ بدنام زمانہ دہشت گردوں کے زیر استعمال تھے۔آئی ایس پی آر کا کہنا تھا کہ کولیٹرل نقصان سے بچنے کے لیے زیادہ سے زیادہ احتیاط برتی گئی، ڈرون، راکٹ، بارودی سرنگوں اور اسٹینڈ آف ہتھیاروں کا استعمال کرتے ہوئے درست حملے کیے گئے۔پاک فوج کے مطابق حملوں میں مارے گئے دہشت گردوں میں دوست عرف چیئرمین، بجار عرف سوغت، ساحل عرف شفق، اصغر عرف بشام اور وزیر عرف وزی شامل ہیں۔
آئی ایس پی آر کے مطابق، پاکستان نے ایران کے اندر ان اڈوں کے خلاف موثر حملے کیے جو پاکستان میں حالیہ حملوں کے ذمہ دار دہشت گردوں کے زیر استعمال تھے، دونوں ہمسایہ برادر ممالک کے درمیان دوطرفہ مسائل کے حل کے لیے بات چیت اور تعاون کو سمجھ داری سمجھا جاتا ہے ۔
آئی ایس پی آر کے مطابق ہم پاکستانی عوام کی حمایت سے پاکستان کے تمام دشمنوں کو شکست دینے کے لیے پرعزم ہیں، پاکستان کی خودمختاری اور علاقائی سالمیت کے احترام اور کسی بھی مہم جوئی کے خلاف سیکیورٹی کو یقینی بنانے کا ہمارا عزم غیر متزلزل ہے۔ پاکستان کی مسلح افواج دہشت گردی کی کارروائیوں کے خلاف پاکستانی شہریوں کے تحفظ کو یقینی بنانے کے لیے ہمہ وقت تیار ہیں۔
