پشاور دھماکے میں ہلاک اور زخمی ہونے والے دہشت گردوں کی شناخت ہو گئی ہے

۔ ناصر باغ روڈ پر ہونے والے دھماکے میں خودکش بمبار سمیت تینوں دہشت گردوں کی شناخت ہوگئی۔ سی ٹی ڈی کی ابتدائی رپورٹ کے مطابق موٹر سائیکل دھماکے میں ہلاک دہشت گرد 5 کلو بارودی مواد لے کر اپنے ہدف کی جانب بڑھ رہے تھے کہ ناصر باغ روڈ پر بارودی مواد پھٹ گیا۔ دھماکے میں ہلاک ہونے والے خودکش بمبار محمد سلمان کا تعلق ضلع دیر سے تھا اور وہ پشاور کے علاقے تہکال کا عارضی رہائشی تھا۔ خودکش حملے کے ساتھی عامر اور زخمی ہونے والے عسکریت پسند عثمان کا تعلق پشاور کے علاقے تہکال سے ہے۔ سی ٹی ڈی کے مطابق زخمی شدت پسند کے ہوش میں آتے ہی تفتیش شروع کر دی جائے گی۔ سی ٹی ڈی کی ابتدائی رپورٹ میں بتایا گیا ہے کہ دہشت گردوں کا موٹرسائیکل کا چیسس نمبر، شناختی کارڈ اور مدرسہ کارڈ بھی برآمد کر لیا گیا ہے۔ تینوں شدت پسند موٹر سائیکل پر سوار تھے۔ یاد رہے کہ نذیر باغ روڈ پر دھماکے میں 2 دہشت گرد ہلاک اور ایک زخمی ہوا تھا۔